Mərkəzi Elmi Kitabxana tərəfindən “Azərbaycanın elm və mədəniyyət xadimləri” seriyasından AMEA-nın müxbir üzvü Tehran Mustafayevin biblioqrafik göstəricisi tərtib edilib.
Kitabın elmi redaktoru, AMEA-nın vitse prezidenti, akademik İsa Həbibbəyli, redaktoru dosent Şəhla Tahirqızı, tərtibçisi doktorant Afət Məmmədovadır.
Biblioqrafik göstərici Tehran Əlişan oğlu Mustafayevin elmi-pedaqoji fəaliyyətinin 1981-2020-ci illərini əhatə edir. Göstəriciyə alimin həyatı, elmi-pedaqoji fəaliyyəti haqqında oçerk, dərslik və dərs vəsaitlərinin, Azərbaycan və rus dillərində dərc olunmuş məqalələrinin, respublika və beynəlxalq əhəmiyyətli konfranslardakı məruzələrinin, elmi-tədqiqat işlərinin və s. biblioqrafiyası daxil edilib.
Vəsaitdə, həmçinin T.Mustafayevin redaktə etdiyi kitablar, görkəmli elm və mədəniyyət xadimlərinin alim haqqında fikirləri, onun həyatı, elmi və ictimai fəaliyyəti haqqında mənbələr də yer alıb.
Kitabdan istifadəni asanlaşdırmaq məqsədi ilə soraq axtarış aparatı tərtib edilib, Tehran Mustafayevin əsərlərinin, eyni zamanda dövri, ardı davam edən və seriyalı nəşrlərin əlifba göstəricisi verilib.
Biobiblioqrafik göstərici filologiya sahəsində çalışan alim və mütəxəssislər, ali məktəb tələbələri, həmçinin geniş oxucu kütləsi üçün nəzərdə tutulub.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.