www.science.az
18.11.2016 15:38

“Azərbaycan əlyazmaları dünya kitabxanalarında” adlı I beynəlxalq elmi-nəzəri konfrans keçirilib

Noyabrın 18-də AMEA-nın Füzuli adına Əlyazmalar İnstitutunda “Azərbaycan əlyazmaları dünya kitabxanalarında” adlı I beynəlxalq elmi-nəzəri konfrans öz işinə başlayıb. Azərbaycan Respublikasının dövlət müstəqilliyinin bərpasının 25 illiyinə həsr olunan konfrans Azərbaycan əlyazmalarının dünyada tanıdılması və təbliği məqsədi daşıyırdı.

Tədbir iştirakçıları əvvəlcə əlyazmalardan ibarət sərgi ilə tanış olublar.

Beynəlxalq konfransda çıxış edən AMEA-nın vitse prezidenti, Nizami adına Ədəbiyyat İnstitutunun direktoru, akademik İsa Həbibbəyli belə bir tədbirin keçirilməsini tarixi hadisə adlandırıb. Bildirib ki, müstəqillik illərində Azərbaycana aid əlyazmaların geniş şəkildə araşdırılmasına və tədqiqinə, elmimizin inkişafına çox geniş imkanlar yaradılıb. Dünya kitabxanalarında əlyazmaların öyrənilməsində AMEA-nın Əlyazmalar İnstitutunun rolundan danışan akademik milli mənəvi dəyərlərimizin daşıyıcısı olan əlyazmaların yenidən nəşrini yüksək qiymətləndirib.

Sonra çıxış edən Humanitar Elmlər Bölməsinin akademik-katibi, Əlyazmalar İnstitutunun direktoru Teymur Kərimli rəhbərlik etdiyi müəssisədə əlyazmaların toplanması, araşdırılması, tədqiqi sahəsində həyata keçirilən tədbirlərdən, qazanılan uğurlardan danışıb.

Akademik Vasim Məmmədəliyev milli-mənəvi dəyərlərimizin qorunub saxlanılmasının və inkişaf etdirilməsinin vacibliyini diqqətə çatdırıb.

Daha sonra Misir Ərəb Respublikasının Azərbaycandakı səfirliyinin Mədəniyyət və Təhsil Əlaqələri Mərkəzinin müdiri Əhməd Sami Elaydi çıxış edərək ölkəsində Azərbaycana aid çoxsaylı əlyazmaların mövcud olduğunu bildirib.

Tədbirin plenar iclasında Nəsimi adına Dilçilik İnstitutunun direktoru, AMEA-nın müxbir üzvü Möhsün Nağısoylunun “Azərbaycan tərcümə əsərlərinin əlyazmaları dünya kitabxanalarında”, professor Kamandar Şərifovun “Misirdə saxlanılan Azərbaycan əlyazmaları”, tarix üzrə elmlər doktoru Tahirə Həsənzadənin “Azərbaycan əlyazmaları Astani-Qüdsi-Rəzəvi kitabxanasında”, filologiya üzrə fəlsəfə doktoru Şəhla Məcidovanın “Özbəkistanda qorunan Azərbaycan əlyazmaları” mövzusunda məruzələri dinlənilib.

© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.