Məlum olduğu kimi, Andrey Petrov Fondunun və Sankt-Peterburq Şəhər Mədəniyyət Komitəsinin təşkilatçılığı ilə 1994-cü ildən başlayaraq, hər iki ildən bir Rusiyanın Sankt-Peterbur şəhərində bəstəkarlar arasında simfonik orkestr üçün ən yaxşı əsər üzrə müsabiqə keçirilir.
Bu il Andrey Petrov adına Bəstəkarların XII Beynəlxalq müsabiqəsinin final gecəsi Şostakoviç adına Sankt-Peterburq Dövlət Filarmoniyasının böyük salonunda təşkil olunub.
Görkəmli Azərbaycan bəstəkarı, Xalq artisti, Bəstəkarlar İttifaqının sədri, UNESCO-nun Sülh artisti, AMEA-nın müxbir üzvü Firəngiz Əlizadə artiq üçüncü dəfədir bu nüfuzlu müsabiqənin A.Knayfel, A.Desyatnikov, P.Karmanov, F.Lednev, N.Xruşşeva, Dm.Yanov-Yanovski kimi tanınmış musiqiçilərdən təşkil olunan münsiflər heyətinə rəhbərlik edir.
Bu mərhələdə müsabiqəyə təqdim edilmiş 107 əsərdən 6-sı səsləndirilib.
Final mərhələsinin konsertindən sonra çıxış edən münsiflər heyətinin sədri F.Əlizadə Rusiya və Azərbaycanın bəstəkarlıq məktəblərinin dərin köklərə malik yaradıcılıq əlaqələrindən bəhs edib. O, səslənmiş əsərlər haqqında danışaraq, gənc bəstəkarlara yeni-yeni yaradıcılıq uğurları arzulayıb.
Bağlanış gecəsinin sonunda qaliblər elan edilib, müsabiqənin laureatlarına mükafatlar təqdim olunub.
Rusiyanın “Kultura” kanalında konsertdən kadrlar, həmçinin F. Əlizadənin geniş müsahibəsi yayımlanıb.
© Bütün hüquqlar qorunur. Xəbərlərdən istifadə edərkən www.science.gov.az saytına istinad zəruridir.